مقدمة
في ظل الجهود لزيادة المحتوى العربي التقني لابد من الإهتمام بكل الفئات المختلفة من الشعوب العربية و المتحدثين باللغة العربية. من ضمن الجهود دي لازم يوجد جهود تهتم بعمل أدوات مساعدة (assistive technology) زي قارئات الشاشة (screen readers) مفتوحة المصدر. كمان لازم يوجد جهود للإهتمام العام بذوي الاحتياجات المختلفه زي اللي عندهم مشاكل في السمع و الإبصار عن طريق الإهتمام بمبادئ إمكانية الوصول (Accessibility) و رفع الوعي العام للمطورين و مقدمين المحتوى بأهمية المبادئ دي.
الملف ده مش نهائي و يلزمة مشاركات اكتر بكتير من كافة الخبرات العربية الموجودة داخل و خارج الوطن العربي. محتاجين نناقش ايه اللي نقدر نعمله و ازاي نقدر نوصل للإهداف الموجودة و وضع اهداف جديدة.
الفهرس
سبب وجود الريبو دي
في وقت كتابة الملف ده و حسب وزارة الصحة بالمملكة العربية السعودية تم تقدير نسب الأكّفّاء وضعاف النظر المتحدثين باللغة العربية او عايشين في الوطن العربي لعام 2010 بما يقرب الـ 12% من نسبة العمى الكلّي في العالم كله, يعني حوالي 5 مليون عايشين في إقليم شرق المتوسط. كمان حسب المكتب الإقليمي لشرق المتوسط لمنظمة الصحة العالمية ان في ما يقدّر بـ 28 مليون شخص في إقليم شرق المتوسط عندهم صمم كلّي. و عشان كده لازم يبقى في جهود اكتر بكتير — بجانب زيادة المحتوى — عشان نقدر نقدم محتوى على شبكة المعلومات (WWW) يمكن الوصول ليه بسهولة عن طريق أي حد بدون تمييز, و بكده يبقى اتحقق اساس من اسس الويب.
المحتوى العربي في حالتة الحالية قليل, عدد الناس اللي بتشارك خبراتها باللغة العربية قليل, و التوجه العام في مجال التقنيات هو الانجليزية. و على الرغم من ان دي حاجة ممكن تتشاف طبيعية إلا انها بتحط المطورين و المتعلمين العرب تحت رحمة خبرتهم في اللغة الإنجليزية, و ده مش عادل — على الاقل في البدايات.
الأهداف
- رفع مستوى جودة المحتوى العربي الموجود
- زيادة التوعية عن وجوب وجود محتوى عربي ذو جودة عالية
- تطوير تقنيات مساعدة أو إعادة تدوير تقنيات موجودة مسبقاً في جهود موّحدة لخدمة المستخدمين العرب
- الإهتمام بالترجمة من اللغة الإنجليزية للغة العربية
- الإهتمام بتعليم المطورين العرب قواعد و معايير انشاء برمجيات متاحة للجميع
دليل المساهمة Contribution Guide
المشروع ده هو ناتج مساهمات المجتمع العربي و غير العربي في تحسين جودة المحتوى العربي و سهولة الوصول ليه, عشان كده من الطبيعي إننا نرحب بأي مساهمة سواء كانت سؤال بسيط, طلب, نقاش, تطوير تقنيات, او اي طريقة تانية للمساهمة.
كل اللي عليكوا تعملوا issue جديدة على الريبو دي, و من خلالها هنقدر نتناقش في اي حاجة تحبوها. المشروع لسه جديد و مع ذلك اهميته كبيره, و لذلك لازم ننظمله قواعد سلوكية. علشان كده احنا بنتبنى ميثاق القواعد السلوكية للمساهمين Contributor Covenant Code of Conduct.
المساهمات مش محدودة لذوي الخبرة, ولا لأشخاص من دول معينة. أي حد يقدر يساهم, و كله لهدف تحسين المحتوى العربي. تقدروا تخشوا على صفحة الـ issues وتشوفوا ايه النقاشات اللي شغالة حالياً قبل فتح نقاش جديد عشان بس ميبقاش في تكرار و ضياع للمجهود.
لما تحاولوا تردوا او تعملوا isssue هتلاقوا الكلام جي من الشمال لليمين و لو اتكتب فيه كلمة انجيزية بيتلغبط تماماً, الحل لده هو انكوا تحطوا الكلام كله مابين ده:
<div dir="rtl">
// اكتب هنا
</div>هتلاقوا كل الطرق الممكنة (اللي فكرت فيها على الاقل) عشان تساهموا ازاي في دليل المساهمة
مشاريع مساهمة
يمكنكم تصفح مشاريع عربية تساهم في الملف الموجود بإسم Notable Projects.md. كما يمكنكم المساهمة فيه عن طريق بناء مشروع عربي يهدف لزيادة او تحسين المحتوى او تعديل الملف و اضافة مشاريع وجدتها او تعرفها ذات اهداف متناسقة مع اهداف هذا المشروع.